Marie D. Beaubrun Jean Louis

Jodi a, nou rasamble pou nou selebre lavi yon fam ki ekstraodinè, Manmi cheri nou: Marie Dolfie Beaubrun Jean-Louis. Lanmò ak depa Manmi kite yon gwo trou vid nan lavi nou; men, lanmou Manman nou, legasi li, ak memwa li yo ap toujou rete chankre nan kè nou. Marie Dolfie Beaubrun Jean-Louis, Manman nou, te fèt jou 24 Janvye 1960, nan lavil Jeremie, Haiti. Nan lane 1965, a laj de 5 an, li rantre nan vil Pòtoprens avèk Manman li, Marlene Jean-Louis, pou abite nan vil Kafou. Aprè sa a, yo ale nan Legliz Evanjelik Indijèn d’Haiti kote li te kòmanse evolye nan travay Bondye.

Lè Manman nou vini o Zetazini, li kontinye travay nan Legliz De Dieu Prince de Paix. Li te konn chante nan gwoup, te konn patisipe nan aktivite jenès, te konn anseye klas Lekòl di dimanch, te konn dirije sèvis, te konn dirije koral, te konn preside gwoup Dam, te yon Konseye pou tout moun, te nan komite santral Legliz Indijèn, e li te yon Dyakonès nan Prince de Paix. Nan lane 1982, a laj de 22 zan, Manman nou te kontre ak yon jenn gason ki te pran kè li e ki rele Pierre Michelet Beaubrun. Preske 2 zan aprè, yo marye, jou ki te 26 Me 1984. Ansanm, yo fè 5 bèl timoun: Rhode, Josue, Sherley, Eunice, Noemie. Yo te marye pou 40 tan. Manman nou te visite plizyè peyi: France, Israel, Etazini.

Nan lane 2003, Manman nou ak pitit fi li: Rhode, te rantre nan peyi Etazini nan lavil Miami. Depi lè li vini an, li te mache nan L’Eglise de Dieu Prince de Paix. Nan lane 2004, rès timoun ni yo vini jwenn li. Nenpòt legliz kote Manman nou pase, li te toujou patisipe; se sa ki fè lè li pa la, ou ka remake sa. Manman nou te gen anpil metye: li te Kouteryèz, kosmetoloji, avek Spesyalis nan manje nan konpayi Jackson Rehabilitation Center. Sipò san parèy Manman nou, ansanm avek gidans li ak lanmou inkondisyonel li, fè nou moun ke nou ye jodi a. Li te gen yon lanmou ki kontajyez epi souri li toujou afekte menm move jou yo. Kelkeswa kote li te ye, li te toujou ap fredone oubyen chante yon chan.

Li toujou tap di: Fè tout sa ou ka fè pandan ou ka fè-l, pou lè ou pa ka fè ankò. Mwen sonje akolad ak moman rekonfò ou yo. Fòs ak rezilians ou enspire nou pou nou pèsevere. Lafwa solid ansanm ak valè ke ou te genyen, gide fanmi an nan bon e nan move tan. Lanmou ou te gen pou fanmi, zanmi, ak kominote a te san parèy. Ou te gen yon fason ou te ankadre tout moun; se sak fè anpil moun te renmen rete bò kote ou. Pandan nap di ou orevwa, nou rekonfòte nou paske ou pap soufri ankò. Kounye a, ou gen lapè, e wap retann gwo jou ki gen pou vini an. Memwa w ap kontinye inspire nou pou nou viv avek lanmou, jantiyès, ak konpasyon. Repoze an pè Manmi. Lanmou ou ap toujou briye e nap pote li nan kè nou pou tout tan. Nou renmen ou anpil. Manmi nou kite anpil moun dèyè. Mari li: Pierre Michelet Beaubrun; Pitit li yo: Rhode, Josue, Sherley, Eunice avèk Samuel Lafrance, Noemie avèk Pierre Vernet. Pitit Pitit li yo: Staelle, Jaelle, Audrey-Laure, Annaelle, Rodley, Ethan. Pitit adoptif li yo: Rebecca e Velène. Frè ak Sè yo: Jean-Ernst, Romane, Marlona, Marie-Buddy, Gontrant, Grimler. Nyès ak Neve li yo: Gabriel, Kernest, Kenley, Gabner, Gloria, Gontrand Junior, Louise Marlena, Gabriella, avèk Christopher. Matant Li: Francoise Lundi. Ak tout lòt moun ki afekte pa lanmò sa a. Mèsi.